ભાજપના ધારાસભ્ય રામ કદમે મંગળવારે જણાવ્યું હતું કે તેઓ મુંબઈની વસઈની રહેવાસી શ્રદ્ધા વોકરની હત્યા પાછળ સંભવિત લવ જેહાદ એંગલથી તપાસ કરવા માટે દિલ્હી પોલીસને પત્ર લખશે.
મુંબઈના ધારાસભ્ય કદમ અને તેમના સમર્થકો મંગળવારે અહીં ઘાટકોપર વિસ્તારમાં એકઠા થયા હતા. તેઓએ શ્રદ્ધા વોકરના લિવ-ઈન પાર્ટનર આફતાબ અમીન પૂનાવાલા વિરુદ્ધ નારેબાજી કરી હતી. પોતાનો ગુસ્સો વ્યક્ત કરવા તેઓ આફતાબનું પૂતળું પણ લાવ્યા હતા. આફતાબ પર શ્રદ્ધાની હત્યાનો આરોપ છે અને દિલ્હી પોલીસે તેની ધરપકડ કરી છે.
પોલીસ મંગળવારે આરોપી પૂનાવાલાને દક્ષિણ દિલ્હીના છતરપુર વિસ્તારના જંગલોમાં લઈ ગઈ હતી, જ્યાં તેણે આ વર્ષે મે મહિનામાં વોકરની હત્યા કર્યા બાદ તેના શરીરના અંગો કથિત રીતે ફેંકી દીધા હતા.
પૂછપરછ દરમિયાન પૂનાવાલાએ પોલીસને જણાવ્યું હતું કે લગ્નને લઈને ઝઘડા થયા બાદ તેણે શ્રદ્ધા વોકરની હત્યા કરી હતી અને તેના શરીરના 35 ટુકડા કરી નાખ્યા હતા. શરીરના ટુકડા કરવાનો વિચાર અમેરિકન ક્રાઈમ ટીવી સીરિઝ ‘ડેક્સ્ટર’થી પ્રેરિત હતો.
અહીં પત્રકારો સાથે વાત કરતા ભાજપના ધારાસભ્યએ કહ્યું, ‘હું દિલ્હી પોલીસને પત્ર લખીને શ્રદ્ધાની હત્યા પાછળ ‘લવ જેહાદ’ની શક્યતાની તપાસ કરવા વિનંતી કરીશ. શું આ ઘટના પાછળ કોઈ જૂથ કે ટોળકી છે? શું આમાં કોઈ દુશ્મન રાજ્ય સામેલ છે? તેની તપાસ થવી જોઈએ.’
તેમણે કહ્યું,’શ્રદ્ધાની હત્યાને એકલા કેસ તરીકે જોવી જોઈએ નહીં.’ તેમણે કહ્યું કે આ પ્રકારની ઘટનાઓ પહેલા પણ બની ચુકી છે. કદમે મૃતકોના પરિવારજનોને પણ પોતાની સમર્થન આપ્યું. દિલ્હી પોલીસના જણાવ્યા અનુસાર, પૂનાવાલાએ શરીરના અંગોને સુરક્ષિત રાખવા માટે રેફ્રિજરેટર ખરીદ્યું હતું અને તેનો નિકાલ કરવા માટે તે અડધી રાત્રે બહાર જતો હતો.
