નવી દિલ્હી,
ભારતના ચૂંટણી પંચ (ECI) દ્વારા આયોજિત 3-દિવસીય ‘ભારત આંતરરાષ્ટ્રીય લોકશાહી અને ચૂંટણી વ્યવસ્થાપન પરિષદ’ (IICDEM) 2026 નો આજે નવી દિલ્હીના ભારત મંડપમ ખાતે પ્રારંભ થયો. મુખ્ય ચૂંટણી કમિશનર (CEC) શ્રી જ્ઞાનેશ કુમાર અને ચૂંટણી કમિશનરો (ECs) ડૉ. સુખબીર સિંહ સંધુ અને ડૉ. વિવેક જોશીએ આશરે 60 આંતરરાષ્ટ્રીય પ્રતિનિધિઓનું ઔપચારિક સ્વાગત કર્યું.
આ ભવ્ય ઉદઘાટન સત્રમાં 42 ચૂંટણી વ્યવસ્થાપન સંસ્થાઓ (EMBs) ના પ્રતિનિધિઓ, 27 દેશોના રાજદૂતો/હાઈ કમિશનરો, 70 થી વધુ રાષ્ટ્રીય સંસ્થાઓના નિષ્ણાતો અને ભારતના 36 મુખ્ય નિર્વાચન અધિકારીઓ (CEOs) સહિત આશરે 1,000 આમંત્રિત મહેમાનોએ હાજરી આપી હતી. આ પ્રસંગે મુખ્ય ચૂંટણી કમિશ્નર શ્રી જ્ઞાનેશ કુમારે જણાવ્યું હતું કે, છેલ્લા દાયકાઓમાં ચૂંટણી વ્યવસ્થાપન સંસ્થાઓની કામગીરીમાં મોટું પરિવર્તન આવ્યું છે. ભારત, વિશ્વની સૌથી મોટી લોકશાહી તરીકે, 1.5 અબજની વસ્તી અને 28 રાજ્યો તથા 8 કેન્દ્રશાસિત પ્રદેશોમાં અભૂતપૂર્વ સ્તરે ચૂંટણીઓનું સંચાલન કરે છે.
ચૂંટણી કમિશ્નર ડૉ. સુખબીર સિંહ સંધુએ નાગરિકોના વિશ્વાસને અમૂલ્ય ગણાવતા કહ્યું કે દરેક ચૂંટણીના કેન્દ્રમાં નાગરિક હોય છે. નાગરિકોની પસંદગીનું સન્માન જળવાય તે જોવાની સામૂહિક જવાબદારી ચૂંટણી સંસ્થાઓની છે. જ્યારે ચૂંટણી કમિશ્નર ડૉ. વિવેક જોશીએ પોતાના સંબોધનમાં ઉમેર્યું હતું કે, IICDEM-2026 ચૂંટણી પ્રક્રિયા સાથે સંકળાયેલા અને યોગદાન આપનારા સંશોધકો, વિદ્યાર્થીઓ અને નિષ્ણાતોને એક મંચ પર લાવવાનું માધ્યમ બની છે. આ અવસરે IIIDEMના DG શ્રી રાકેશ વર્માએ થીમ ‘સર્વસમાવેશક, શાંતિપૂર્ણ, મક્કમ અને ટકાઉ વિશ્વ માટે લોકશાહી’ પર પ્રકાશ પાડીને 21મી સદીમાં લોકશાહીના વ્યાપક અને બહુપરિમાણીય ઉદ્દેશ્યો સ્પષ્ટ કર્યા હતા.
કાર્યક્રમ દરમિયાન વોર્નર બ્રધર્સ ડિસ્કવરીના સહયોગથી નિર્મિત ડોક્યુસિરીઝ “ઇન્ડિયા ડિસાઇડ્સ” ની ઝલક દર્શાવવામાં આવી હતી. વોર્નર બ્રધર્સ ડિસ્કવરીના મેનેજિંગ ડિરેક્ટર શ્રી અર્જુન નોહવારે જણાવ્યું હતું કે, આ ડોક્યુસિરીઝ વિશ્વના સૌથી જટિલ મેન્ડેટ ધરાવતી સંસ્થાની કામગીરી અને સામાન્ય ચૂંટણીઓને દ્રશ્યોના માધ્યમથી રજૂ કરે છે.
