બિહારના શિવહરથી BJP સાંસદ રમા દેવીએ એક વિવાદાસ્પદ નિવેદન આપ્યું છે. લોકો સાથે વાતચીત દરમિયાન તેમણે મોતિહારીની ઢાકા વિધાનસભાને પાકિસ્તાન ગણાવી છે. કુઢની વિધાનસભામાં ચૂંટણી પ્રચાર દરમિયાન સાંસદ રમા દેવીએ ઢાકાના ધારાસભ્ય પવન જયસ્વાલ તરફ ઈશારો કર્યો હતો. તેમણે કહ્યું કે અમે લોકોએ તો પાકિસ્તાન પણ જીત્યું છે અને ઢાકા તો પાકિસ્તાન જ છે ને. સાંસદે વધુમાં કહ્યું કે પવન જયસ્વાલ ત્યાંથી જીતીને ધારાસભ્ય બન્યા છે.
જણાવી દઈએ કે ઢાકા વિધાનસભા મુસ્લિમ બહુમતી વિસ્તાર છે. રમા દેવીના આ નિવેદન પર જન અધિકારી પાર્ટીએ ઝાટકણી કાઢી છે. જન અધિકારી પાર્ટીએ કહ્યું છે કે ઢાકાને પાકિસ્તાન કહેવું અને પવન જયસ્વાલને પાકિસ્તાનના ધારાસભ્ય કહેવું ઘણું શરમજનક છે.
વાસ્તવમાં કુઢની વિધાનસભામાં ચૂંટણી પ્રચાર દરમિયાન રમા દેવીએ પત્રકારોને ત્યાં હાજર નેતાઓનો પરિચય કરાવતા આ વાતો કહી હતી. સાંસદે ઢાકાના ધારાસભ્ય અને પાકિસ્તાન જીતનાર નેતા ગણાવ્યા હતા.
તેમણે કહ્યું કે અમે પાકિસ્તાન જીતીને આવ્યા છીએ અને પવન ત્યાંના ધારાસભ્ય છે. જો કે તેમણે આ વાતો મજાકમાં અને અનૌપચારિક રીતે કહી હતી, પરંતુ હવે આ મામલો રાજકીય રંગ લેવા લાગ્યો છે.
જન અધિકારી પાર્ટીએ સાધ્યું નિશાન
જન અધિકાર પાર્ટીના પ્રવક્તા અને રાજ્યના મહાસચિવ અભિજીત સિંહે રમા દેવી અને બીજેપીના અન્ય નેતાઓને આ માટે જાહેરમાં માફી માંગવાની વાત કહી છે. તેમણે કહ્યું કે જો સાંસદો રમા દેવી અને પવન જયસ્વાલ ઢાકાની જનતાની માફી નહીં માંગે તો આ માટે આરપારની લડત થશે.
ઢાકાના લોકોનું અપમાન કર્યું છે: જન અધિકારી પાર્ટી
જન અધિકાર પાર્ટીના પ્રવક્તાએ કહ્યું કે રમા દેવી અને પવન સિંહે સમગ્ર ઢાકાના લોકોને અપમાનિત કર્યા છે. જે જનતાના વોટને કારણે આજે તેઓ સાંસદ અને ધારાસભ્ય છે, આ લોકો એ જ ઢાકાને પાકિસ્તાન કહી રહ્યા છે. તે શરમજનક છે.
તેમણે કહ્યું કે શું રમા દેવી ભૂલી ગયા છે કે ઢાકાના ત્રણ લાખથી વધુ મતદારોએ તેમને ઘણી વખત સાંસદ બનાવ્યા છે, શું તે પાકિસ્તાની છે? શું ઢાકાના તમામ હિંદુ અને મુસ્લિમો પાકિસ્તાનના નાગરિક છે? શું ઢાકા પાકિસ્તાનમાં આવે છે? તેમણે કહ્યું કે આ નેતાઓએ ઢાકાના અસ્તિત્વ પર સવાલ ઉઠાવ્યા છે. આ સમગ્ર વિધાનસભાનું અપમાન છે. આ માટે આરપારની લડાઈ થશે.
