(જી.એન.એસ) તા. ૧
અમદાવાદ,
પૂર્વ અને પશ્ચિમ વિસ્તારને જોડતા અત્યંત મહત્વપૂર્ણ એવા જૂના સુભાષ બ્રિજને દૂર કરવાની અતિ જટિલ કામગીરીમાં મ્યુનિસિપલ કોર્પોરેશન અને એન્જિનિયરિંગ ટીમને મોટી સફળતા મળી છે. સાબરમતી નદીના પટમાં આવેલા બ્રિજના 3 મહાકાય સ્પાનનું ડિમોલિશન સફળતાપૂર્વક અને સંપૂર્ણ સુરક્ષિત રીતે પૂર્ણ કરવામાં આવ્યું છે. આ સમગ્ર હાઈ-ટેક ઓપરેશન દરમિયાન તમામ સ્પાનને અત્યંત સાવચેતીપૂર્વક તોડીને ‘કન્ટ્રોલ્ડ ડિમોલિશન’ પદ્ધતિથી નિયંત્રિત રીતે નીચે નદીના પટમાં ઉતારવામાં આવ્યા હતા. આ મલ્ટી-સ્ટેજ કામગીરી દરમિયાન કોઈપણ પ્રકારની અનિચ્છનીય ઘટના કે અકસ્માત સર્જાયો નથી, જે તંત્ર માટે મોટી રાહતના સમાચાર છે.
કોર્પોરેશનના અધિકારીઓએ જણાવ્યું હતું કે, ત્રણેય સ્પાનને અત્યંત સાવચેતીપૂર્વક તોડીને નિયંત્રિત રીતે નીચે ઉતારવામાં આવ્યા હતા. આ કામગીરી નિષ્ણાતોની દેખરેખ હેઠળ કોન્ટ્રાક્ટર દ્વારા કરવામાં આવી હતી. સ્થળ પર સતત મોનિટરિંગ કરવામાં આવતું હતું, સાથે જ તમામ નિર્ધારિત સલામતી ધોરણો અને પ્રોટોકોલનું કડક પાલન કરવામાં આવ્યું હતું.
ડિમોલિશન દરમિયાન બ્રિજના સમગ્ર વિસ્તારને સંપૂર્ણપણે બેરિકેડિંગ કરીને પ્રતિબંધિત ઝોન જાહેર કરવામાં આવ્યો હતો. કોઈપણ વ્યક્તિને બ્રિજની આસપાસ પ્રવેશ આપવામાં આવ્યો નહોતો. સુરક્ષાને સર્વોચ્ચ પ્રાથમિકતા આપીને સમગ્ર કામગીરીનું આયોજન કરવામાં આવ્યું હતું.
મનપા. ની આ સફળ કામગીરી સાથે જૂના સુભાષ બ્રિજના કુલ ત્રણ અત્યંત મહત્ત્વના ગણાતા સ્પાન જમીનદોસ્ત કરી દેવાયા છે. બ્રિજ તૂટ્યા બાદ નદીના પટમાં ભેગા થયેલા વિશાળ ડેબ્રીઝ (કાટમાળ અને કોંક્રિટના ટુકડા)ને હટાવવાની કામગીરી પણ યુદ્ધના ધોરણે શરૂ કરી દેવામાં આવી છે. જેથી નદીનું પર્યાવરણ જોખમાય નહીં. મ્યુનિસિપલ કોર્પોરેશનના સૂત્રોના જણાવ્યા અનુસાર, આગામી તબક્કામાં પણ નિર્ધારિત ટાઈમલાઈન અને આયોજન મુજબ, સલામતીના તમામ કડક માપદંડોનું પાલન કરીને બ્રિજના બાકીના હિસ્સાને તોડવાની કામગીરી તબક્કાવાર હાથ ધરવામાં આવશે.
