રાજ્યના તાપમાનમાં એકથી બે ડિગ્રીની વધઘટ થવાની શક્યતા
(જી.એન.એસ),તા.૧૧
અમદાવાદ
રાજ્યમાં અત્યારે મિશ્ર વાતાવરણ જોવા મળી રહ્યું છે. હવામાન વિભાગના ડાયરેક્ટર ડો. એ. કે. દાસના જણાવ્યા અનુસાર, હાલમાં ઉત્તર પૂર્વથી પૂર્વ તરફના પવન ફૂંકાઈ રહ્યા છે, જેથી લઘુત્તમ તાપમાનમાં કોઈ ખાસ બદલાવ જોવા નહીં મળે. ફક્ત એકથી બે ડિગ્રી સેલ્સિયસ વધઘટ થવાની શક્યતા છે. રાજ્યમાં પહેલીવાર ઠંડીનો પારો સિંગલ ડિજિટમાં પહોંચ્યો છે.
આ શિયાળાની સિઝનમાં સૌથી નીચું લઘુત્તમ તાપમાન નલિયામાં નોંધાયું છે. 8.8 ડિગ્રી સાથે નલિયા રાજ્યમાં સૌથી ઠંડુ શહેર રહ્યું છે. તો ઓખા 21.5 ડિગ્રી સાથે સૌથી ગરમ રહ્યું છે. હાલ રાજ્યના તાપમાનમાં એકથી ત્રણ ડિગ્રીની વધ-ઘટ થતાં મિશ્ર વાતાવરણ જોવા મળી રહ્યું છે.
ગઈકાલે નલિયાનું લઘુત્તમ તાપમાન 9 ડિગ્રી સેલ્સિયસ હતું, જે પણ સિઝનનું સૌથી નીચુ તાપમાન હતું. બીજા દિવસે 0.2 ડિગ્રીના ઘટાડા સાથે સૌથી ઠંડુ શહેર નલિયા રહ્યું. જ્યારે અમદાવાદમાં 0.3 ડિગ્રી સેલ્સિયસના ઘટાડા સાથે 13.1 ડિગ્રી સેલ્સિયસ લઘુત્તમ તાપમાન નોંધાયું હતું.
