અરવલ્લી જિલ્લાના બાયડ તાલુકામાં આવેલા સાઠંબા પોલિસ સ્ટેશનમાં બનેલી ઘટનાને લઇને પોલિસ બેડામાં સનસનાટી મચાવી દેતા પોલિસ હરકતમાં આવી 6 આરોપીઓને ઝડપી પાડવામાં આવ્યા છે. આ સાથે જ પોલિસ સ્ટેશનમાં બનેલી આટલી મોટી ઘટનાને લઇને બેદરકારી દાખવનાર પીએસઓ અને પીએસઆઈ સામે ખાતાકીય તપાસના આદેશ જિલ્લા પોલિસ વડાએ આપ્યા છે.
વાત જાણે એમ છે કે, 21 ઓગસ્ટના રોજ એક વીડિયો વાઈરલ થયો હતો, જેમાં એક શંકાસ્પદ વ્યક્તિને પોલિસ સ્ટેશન લવાયો હતો, જેને કેટલાક લોકો મારપીટ કરી રહ્યા હતા, જેનો વીડિયો સોશિયલ મીડિયામાં વાઈરલ થયો હતો. પોલિસ સ્ટેશનમાં શંકાસ્પદ વ્યક્તિ પર આરોપ હતો કે તેણે બાઈક ચોરી કરી હતી, જેને લઇને લોકોના ટોળે ટોળા 14 ઓગસ્ટના રોજ ઉમટી પડ્યા હતા, અને ત્યારબાદ પોલિસ સ્ટેશનમાં કથિત બાઈક ચોર સાથે મારપીટ કરી હતી અને ટોળાએ કાયદો હાથમાં લીધો હતો. પોલિસ સ્ટેશનમાં બનેલી આટલી મોટી ઘટનાને લઇને પોલિસની કામગીરી પર સવાલો ઉઠતા પોલિસે તાબડતોબ કાર્યવાહી કરી અને 7 લોકો સામે ગુનો નોંધીને તમામને ઝડપી પાડ્યા છે.
પોલિસ સ્ટેશનમાં જ બાઈક ચોર સાથે મારપીટ કરીને પૂછપરછ કરનાર આરોપીઓ સામે ગુનોં તો નોંધ્યો જ છે પરંતુ પોલિસ સ્ટેશનમાં હાજર પીએસઓ અને પીએસઆઈ સામે જિલ્લા પોલિસ વડાએ ખાતાકીય તપાસના આદેશ આપતા પોલિસ બેડામાં ખળભળાટ મચી જવા પામ્યો છે. ત્યારે પોલિસ સ્ટેશનની વાત આવતા ઝંઝીર ફિલ્મમાં અમિતાભ બચ્ચનનો ડાયલોગ પણ ચોક્કસથી યાદ આવી જાય..
પોલિસે પકડેલ આરોપીઓના નામ
- ઇશાનકુમાર અનીલભાઈ પટેલ, રહે. રણેચી, તાલુકો – બાયડ
- અલ્પેશસિંહ પ્રવિણસિંહ સોલંકી, રહે. વાલાની મુવાડી, તાલુકો – બાયડ
- કુંદનગીરી ચંદુગીરી ગોસ્વામી, રહે. સાઠંબા, તાલુકો – બાયડ
- બળવંતસિંહ બાલુસિંહ પરમાર,રહે. વાલાની મુવાડી, તાલુકો – બાયડ
- શક્તિસિંહ મોતીસિંહ સોલંકી,રહે. ખડક, તાલુકો – વિરપુર, જિ. મહિસાગર
- કિશના પુનમભાઈ પરમાર,રહે. વાલાની મુવાડી, તાલુકો – બાયડ
