ઓગસ્ટ ૨૦૨૫માં ગુડ્સ એન્ડ સર્વિસ ટેક્સ (GST)ની આવક રૂ. ૧.૮૬ લાખ કરોડ સુધી પહોંચી છે. ગયા વર્ષે એટલે કે ઓગસ્ટ ૨૦૨૪માં આ આવક રૂ. ૧.૭૫ લાખ કરોડ રહી હતી. એટલે કે આ વર્ષે ઓગસ્ટમાં જીએસટી આવકમાં ૬.૫%નો વધારો નોંધાયો છે. જોકે, જુલાઈ ૨૦૨૫માં રૂ. ૧.૯૬ લાખ કરોડની આવક સામે ઓગસ્ટમાં આવક ઘટી છે.
ઓગસ્ટ મહિનામાં જીએસટી રિફંડ રૂ. ૧૯,૩૫૯ કરોડ સુધી ઘટી ગયો છે, જે ગયા વર્ષની તુલનામાં ૨૧% ઓછો છે. પરિણામે રિફંડ બાદની નેટ આવકમાં ૧૦%થી વધુનો વધારો થયો છે. આ વૃદ્ધિમાં ગુજરાત, મહારાષ્ટ્ર, કર્ણાટક અને તામિલનાડુનો સૌથી મોટો ફાળો છે, જેમણે મળીને કુલ જીએસટી આવકમાં ૩૩% હિસ્સો આપ્યો છે.
બીજી તરફ ઇમ્પોર્ટ ડયૂટીની આવક ઓગસ્ટમાં ઘટીને રૂ. ૪૯,૩૦૦ કરોડ રહી છે, જ્યારે જુલાઈમાં આ આવક રૂ. ૫૦,૦૦૦ કરોડ હતી. અમેરિકાના ટેરિફ વૉરના કારણે નિકાસકારો તરફથી માગવામાં આવતા રિફંડમાં ૧૮% ઘટાડો નોંધાયો છે. જીએસટીના માળખામાં સેન્ટ્રલ અને સ્ટેટ જીએસટી કલેક્શનમાં વધારો જોવા મળ્યો છે, જ્યારે આઈજીએસટી અને સેસના કલેક્શનમાં ઘટાડો થયો છે.
નિષ્ણાતો માને છે કે હાલ Wholesale Price Index (WPI) અને Consumer Price Index (CPI)માં ઘટાડો થતો હોવાથી આગામી મહિનાઓમાં જીએસટી કલેક્શન પર દબાણ આવી શકે છે. જોકે નવરાત્રિ અને દિવાળી જેવા તહેવારોને કારણે આવનારા મહિનાઓમાં આવકમાં તેજી આવવાની સંભાવના છે. ઉલ્લેખનીય છે કે, વર્ષ ૨૦૨૫ના એપ્રિલ મહિનામાં અત્યાર સુધીનું સૌથી વધુ રૂ. ૨.૩૭ લાખ કરોડનું જીએસટી કલેક્શન થયું હતું.
