Pakistan vs Bangladesh: T20 વર્લ્ડ કપની કરો અથવા મરો મેચમાં પાકિસ્તાને શાનદાર રમત બતાવતા બાંગ્લાદેશને 5 વિકેટે હરાવ્યું હતું. આ જીત સાથે પાકિસ્તાનની ટીમ T20 વર્લ્ડ કપની સેમી ફાઇનલમાં પહોંચનારી છેલ્લી ટીમ બની ગઈ છે.
મેચમાં ટોસ જીતીને બાંગ્લાદેશે પાકિસ્તાનને 128 રનનો ટાર્ગેટ આપ્યો હતો. જવાબમાં પાકિસ્તાને 18.1 ઓવરમાં 5 વિકેટ ગુમાવીને આ લક્ષ્યાંક હાંસલ કરી લીધો હતો. આ મેચમાં પાકિસ્તાન ટીમની જીતનો હીરો તેનો સ્ટાર ફાસ્ટ બોલર શાહીન આફ્રિદી રહ્યો હતો, તેણે આ મહત્વપૂર્ણ મેચમાં શાનદાર બોલિંગ કરીને 4 વિકેટ ઝડપી હતી.
પાકિસ્તાન સેમી ફાઇનલમાં પહોંચ્યું
એડિલેડ ઓવલ ખાતે પાકિસ્તાને બાંગ્લાદેશને હરાવી ટી20 વર્લ્ડ કપની સેમી ફાઇનલમાં સ્થાને મેળવી લીધું છે. આ મેચમાં 128 રનનો પીછો કરવા ઉતરેલી પાકિસ્તાનની ટીમની શરૂઆત સારી હતી અને મોહમ્મદ રિઝવાન અને કેપ્ટન બાબર આઝમે પ્રથમ વિકેટ માટે 57 રનની ભાગીદારી કરી હતી. પાકિસ્તાનને 57 રનના સ્કોર પર પહેલો ફટકો કેપ્ટન બાબર આઝમ (25)ના રૂપમાં લાગ્યો હતો. 61 રન બનાવ્યા બાદ મોહમ્મદ રિઝવાન (32) પેવેલિયન પરત ફર્યો હતો.
જોકે, પાકિસ્તાને આ મેચમાં પોતાની પકડ જાળવી રાખી હતી અને 128 રનનો ટાર્ગેટ 5 વિકેટ ગુમાવીને મેળવી લીધો હતો. આ મેચમાં પાકિસ્તાનના ફાસ્ટ બોલર શાહીન આફ્રિદીએ શાનદાર બોલિંગ કરતા 4 વિકેટ ઝડપી હતી. શાહીન ઉપરાંત ઓલરાઉન્ડર શાદાબ ખાને પણ શાનદાર પ્રદર્શન કર્યું અને 2 બાંગ્લાદેશી બેટ્સમેનોને પેવેલિયનનો રસ્તો બતાવ્યો. આ જીત સાથે પાકિસ્તાન T20 વર્લ્ડ કપની સેમી ફાઇનલમાં પહોંચી ગયું છે.
બાંગ્લાદેશની બેટિંગ નિષ્ફળ રહી હતી
એડિલેડમાં ટોસ જીતીને પ્રથમ બેટિંગ કરવા આવેલી બાંગ્લાદેશની ટીમ આ મેચમાં ઘણી મજબૂત દેખાઈ રહી હતી. મેચની 10.3 ઓવરમાં બાંગ્લાદેશે બે વિકેટ ગુમાવી 73 રન બનાવી લીધા હતા. એક સમયે એવું લાગી રહ્યું હતું કે છેલ્લી 10 ઓવરમાં બાંગ્લાદેશ ઝડપી રન બનાવીને પાકિસ્તાન સામે મોટો સ્કોર ઉભો કરશે. પરંતુ ત્યારપછી પાકિસ્તાને બોલિંગમાં શાનદાર વાપસી કરી હતી અને બાંગ્લાદેશની આખી ટીમ માત્ર 127 રન જ બનાવી શકી હતી. ટાર્ગેટનો પીછો કરતી વખતે પાકિસ્તાનની ટીમે આ ટાર્ગેટને આસાનીથી હાંસલ કરી લીધો અને સેમીફાઈનલમાં પોતાનું સ્થાન નિશ્ચિત કરી લીધું.
