નવી દિલ્હીઃ ન્યૂઝીલેન્ડ સામેની 3 વનડે સીરીઝ બાદ ટીમ ઈન્ડિયાએ બાંગ્લાદેશના પ્રવાસે જવાની છે. જ્યાં બંને દેશો વચ્ચે 3 વનડે સિરીઝ રમાશે. બાંગ્લાદેશે આ સીરિઝ માટે 16 સભ્યોની ટીમની જાહેરાત કરી છે. તમીમ ઈકબાલ ટીમનો કેપ્ટન રહેશે. શાકિબ અલ હસન વનડે ટીમમાં પરત ફર્યો છે. તે બાંગ્લાદેશની છેલ્લી વનડે શ્રેણીમાં રમ્યો ન હતો. તેણે આ વર્ષે જૂલાઈ-ઓગસ્ટમાં ટીમ સાથે વનડે શ્રેણી માટે ઝિમ્બાબ્વેના પ્રવાસે ન જવાનો નિર્ણય કર્યો હતો. ભારત અને બાંગ્લાદેશ વચ્ચે 4 ડિસેમ્બરથી વનડે શ્રેણી શરૂ થશે.
મિડલ ઓર્ડર બેટ્સમેન મોસાદ્દેક હુસૈનના સ્થાને યાસિર અલીને ભારત સામેની વનડે શ્રેણી માટે બાંગ્લાદેશ ટીમમાં જગ્યા મળી છે. આ સાથે જ ડાબોડી સ્પિનર તૈજુલ ઈસ્લામના સ્થાને શાકિબની ટીમમાં પ્રવેશ કરવામાં આવ્યો છે. જ્યાં સુધી ટીમના ઝડપી બોલિંગ આક્રમણની વાત છે તો શરીફુલ ઈસ્લામ આઉટ થઈ ગયો છે. તેમની જગ્યાએ ઇબાદત હુસૈનને દાખલ કરવામાં આવ્યા છે. ઇબાદતે આ વર્ષે જૂલાઇ-ઓગસ્ટમાં ઝિમ્બાબ્વે પ્રવાસ પર વનડેમાં ડેબ્યૂ કર્યું હતું. ત્યારબાદ તેણે શ્રેણીની ત્રીજી મેચમાં શૌરીફુલની જગ્યા લીધી.
ઝિમ્બાબ્વે સામેની પ્રથમ બે વનડેમાં શૌરીફુલ ખૂબ જ મોંઘો સાબિત થયો હતો. તેણે 2 મેચમાં 17.4 ઓવરમાં 134 રન આપ્યા હતા અને માત્ર બે જ વિકેટ લઈ શક્યો હતો. તે જ સમયે, મોસાદ્દેક તે પ્રવાસમાં માત્ર એક જ ODI રમી શક્યો હતો.
તૈજુલ ઈસ્લામે પણ ઝિમ્બાબ્વે પ્રવાસમાં સારી બોલિંગ કરી હતી અને 2 વનડેમાં 3 વિકેટ લીધી હતી. આ પહેલા તેણે વેસ્ટ ઈન્ડિઝ સામે વનડેમાં પ્રથમ વખત 5 વિકેટ લેવાનું કારનામું કર્યું હતું. જો કે આ પ્રદર્શન છતાં ભારત સામેની વનડે શ્રેણી માટે તેને ટીમમાં પસંદ કરવામાં આવ્યો ન હતો. આનું એક જ કારણ છે કે ટીમમાં શાકિબ અને નસુમ અહેમદની હાજરીમાં ત્રીજા ડાબા હાથના સ્પિનરને સ્થાન નથી.
બાંગ્લાદેશ વનડે ટીમ
તમીમ ઇકબાલ, લિટન દાસ, અનામુલ હક, શાકિબ અલ હસન, મુશફિકુર રહીમ, નઝમુલ હુસૈન, નુરુલ હુસૈન, મહમુદુલ્લાહ, અફીફ હુસૈન, યાસિર અલી, મહેંદી હસન મિરાજ, તસ્કીન અહેમદ, હસન મહમૂદ , મુશ્તાફિઝુર રહેમાન, ઇબાદત હુસૈન, નસુમ અહેમદ.
અર્શદીપ સિંહ અને ઉમરાન મલિકનું વનડે ડેબ્યૂ
ઝડપી બોલર અર્શદીપ સિંહ અને ઉમરાન મલિકે ઓકલેન્ડમાં ન્યૂઝીલેન્ડ સામેની પ્રથમ વનડેમાં ભારત માટે વનડે ડેબ્યૂ કર્યું હતું. બંને ફાસ્ટ બોલર ટીમ ઈન્ડિયા માટે પહેલીવાર વનડેમાં જોવા મળશે. વન-ડે પહેલા બંને બોલરોએ ભારતીય ટીમ માટે T20 ડેબ્યુ કર્યું છે. અર્શદીપ સિંહે ટી-20 વર્લ્ડ કપ 2022માં પણ ભારતનું પ્રતિનિધિત્વ કર્યું છે. હવે એ જોવાનું રસપ્રદ રહેશે કે બંને બોલર તેમની પ્રથમ વનડેમાં કેટલા અસરકારક સાબિત થશે.
