સપ્ટેમ્બર ૨૦૨૫ની શરૂઆતમાં વૈશ્વિક માર્કેટ કેપ ૧૪૦.૮૧ ટ્રિલિયન ડોલર સુધી પહોંચી હતી, જેમાં ભારતનો હિસ્સો ૫.૧૪ ટ્રિલિયન ડોલર અથવા ૩.૬૫% રહ્યો હતો. એક વર્ષ પહેલાં, સપ્ટેમ્બર ૨૦૨૪માં ભારતનો હિસ્સો ૪.૫૨% (૫.૬૬ ટ્રિલિયન ડોલર) હતો. એટલે કે છેલ્લા એક વર્ષમાં ભારતના હિસ્સામાં ઘટાડો નોંધાયો છે. હાલ ભારત વૈશ્વિક માર્કેટ કેપમાં હોંગકોંગ પછી પાંચમા સ્થાને છે. અમેરિકાએ ૪૮.૧૦% હિસ્સા સાથે પ્રથમ ક્રમ જાળવી રાખ્યો છે, જ્યારે ચીન બીજા, જાપાન ત્રીજા અને જર્મની ચોથા સ્થાને છે.
રિપોર્ટ મુજબ, ઓગસ્ટ ૨૦૨૫માં ભારતનો હિસ્સો ઘટીને ૩.૬૦% રહ્યો હતો, જે છેલ્લા ૧૬ મહિનામાં સૌથી નીચો સ્તર હતો. જૂનથી ઓગસ્ટ ૨૦૨૫ દરમિયાન વૈશ્વિક માર્કેટ કેપમાં ૬.૭૨ ટ્રિલિયન ડોલરનો વધારો થયો હતો, જ્યારે ભારતની માર્કેટ કેપ ૫.૩૮ ટ્રિલિયન ડોલરથી ઘટીને ૫.૦૩ ટ્રિલિયન ડોલર રહી ગઈ હતી. અમેરિકા, ચીન, જાપાન અને જર્મનીમાં રિકવરીને કારણે છેલ્લા એક વર્ષમાં વૈશ્વિક માર્કેટ કેપમાં ૧૫.૮૨ ટ્રિલિયન ડોલરનો વધારો થયો છે. પરંતુ ભારતની માર્કેટ કેપ આ ગાળામાં ૫.૬૬ ટ્રિલિયન ડોલર પરથી ઘટીને ૫.૦૩ ટ્રિલિયન ડોલર થઈ ગઈ છે.
ત્યાં છતાં, ભારતનું સ્થાન માર્કેટ કેપની દ્રષ્ટિએ વૈશ્વિક ટોચના ૧૦ દેશોમાં યથાવત છે. કંપનીઓની આવકમાં નબળાઈ, વિદેશી સંસ્થાકીય રોકાણકારોની વેચવાલી અને ઊંચા મૂલ્યાંકનને કારણે ભારતની માર્કેટ કેપ પર દબાણ આવ્યું છે. ગયા વર્ષે ઓગસ્ટમાં ભારતની ઈક્વિટી માર્કેટનું મૂલ્યાંકન વૈશ્વિક સ્તરે વધુ હતું. તે સમયે મજબૂત વિદેશી રોકાણ પ્રવાહો અને સારી કોર્પોરેટ કામગીરીના કારણે બજાર મજબૂત રહ્યું હતું. પરંતુ અમેરિકામાં ડોનાલ્ડ ટ્રમ્પની સત્તા આવ્યા પછી નાણાં અમેરિકા તરફ વળ્યાં છે. સાથે જ ઊંચા મૂલ્યાંકનને કારણે ફંડોએ પ્રોફિટ બુકિંગ પણ કર્યું છે. ભારતની માર્કેટ કેપ હાલમાં તેના GDPની સરખામણીએ ૧૭૮% છે, જે લાંબા ગાળાની ૮૭%ની સરેરાશ કરતા ઘણી વધારે છે.
