નવી દિલ્હીઃ ફ્રાન્સના ઓપનર ગુસ્તાવ મેકિઓન T20 ઈન્ટરનેશનલમાં સદી ફટકારનાર સૌથી યુવા બેટ્સમેન બન્યો છે. તેણે 18 વર્ષ અને 280 દિવસની ઉંમરમાં આ કારનામું કર્યું હતું. ગુસ્તાવે સ્વિટ્ઝર્લેન્ડ સામે ICC મેન્સ T20 વર્લ્ડ કપની ક્વોલિફાયર મેચમાં માત્ર 61 બોલમાં 109 રન બનાવ્યા હતા. ગુસ્તાવે પોતાની ઇનિંગમાં પાંચ ચોગ્ગા અને 9 છગ્ગા ફટકાર્યા હતા. આ તેની બીજી આંતરરાષ્ટ્રીય મેચ હતી. અગાઉ, તેણે ચેક રિપબ્લિક સામે તેની પ્રથમ T20I માં 54 બોલમાં 76 રન બનાવ્યા હતા.
આ સાથે ગુસ્તાવે અફઘાનિસ્તાનના બેટ્સમેન હઝરતુલ્લા જાઝાઈનો 2 વર્ષ જૂનો રેકોર્ડ તોડી નાખ્યો છે. અફઘાનિસ્તાનના ઓપનર જાઝાઈએ 2019માં આયર્લેન્ડ સામે 20 વર્ષ 337 દિવસમાં સદી ફટકારી હતી. ત્યારબાદ જાજાઈએ માત્ર 62 બોલમાં અણનમ 162 રન બનાવ્યા હતા.
ગુસ્તાવની સદી નિરર્થક રહી હતી
ગુસ્તાવે પોતાની બીજી ટી20માં સદી ફટકારીને ઈતિહાસ રચ્યો પરંતુ, તેની આ ઇનિંગ પણ ટીમ માટે કામ ન કરી શકી અને સ્વિટ્ઝર્લેન્ડે 1 વિકેટથી મેચ જીતી લીધી. આ મેચમાં ફ્રાન્સે પ્રથમ બેટિંગ કરતા 20 ઓવરમાં 5 વિકેટ ગુમાવીને 157 રન બનાવ્યા હતા. ટીમ માટે ઓપનર ગુસ્તાવે 61 બોલમાં 109 રન બનાવ્યા હતા. તેના સિવાય અન્ય કોઈ બેટ્સમેન મોટી ઈનિંગ રમી શક્યો નહોતો. સ્વિત્ઝર્લેન્ડ તરફથી અલી નય્યરે 2 વિકેટ લીધી હતી.
સ્વિટ્ઝર્લેન્ડે આ મેચ 1 વિકેટે જીતી લીધી હતી
જીતના લક્ષ્યનો પીછો કરવા ઉતરેલી સ્વિસ ટીમની ઇનિંગ્સની શરૂઆત કરતા કેપ્ટન ફહીમ નઝીરે શાનદાર અડધી સદી ફટકારી હતી. તેણે 46 બોલમાં 67 રનની ઇનિંગ રમી હતી. આ પછી છેલ્લી ઓવરમાં બોલથી શાનદાર પ્રદર્શન કરનાર અલી નય્યરે પણ બેટથી ધમાલ મચાવી હતી. તેણે છેલ્લા 3 બોલમાં 12 રન બનાવ્યા અને ફ્રાન્સની જીતની આશા પર પાણી ફરી વળ્યું.
T20માં સદી ફટકારનાર સૌથી યુવા ખેલાડી
ગુસ્તાવ મેકકોન – 18 વર્ષ 280 દિવસ, ફ્રાન્સ વિ સ્વિટ્ઝર્લેન્ડ, વાંતા, 2022
હઝરતુલ્લા જાઝાઈ – 20 વર્ષ 337 દિવસ, અફઘાનિસ્તાન વિ આયર્લેન્ડ, દેહરાદૂન, 2019
શિવકુમાર પેરિયાલવર – 21 વર્ષ 161 દિવસ રોમાનિયા વિ તુર્કી, ઇલ્ફોવ કાઉન્ટી, 2019
ઓર્કિડ ટ્યુસેન્જ – 21 વર્ષ 190 દિવસ, રવાંડા વિ સેશેલ્સ, કિગાલી, 2021
દીપેન્દ્ર સિંહ – 22 વર્ષ 68 દિવસ, નેપાળ વિરુદ્ધ મલેશિયા, કાઠમંડુ, 2022
