પાટણ જિલ્લાના સરસ્વતી તાલુકાના ભીલવણ ગામે સીમમાં આવેલી વડીલો પાર્જિત ખેતીની જમીન ગામના જ એક શખ્સે પચાવી પાડી બીજા એક શખ્સને વેચાણથી આપી ગેરકાયદેસર કબજો કરી દેતા બંને શખ્સો સામે વાગડોદ પોલીસ મથકે લેન્ડ ગ્રેબિંગ નો ગુનો દાખલ કરવામાં આવ્યો છે. ભીલવણ ગામની સીમમાં હમીદભાઈ સુલેમાનભાઈ મુમનના પિતાની વડીલો પાર્જિત કબજા ભોગવટાની ખેતીની જમીન આવેલી છે.
તેમના ગામના અબ્દુલ રસુલ માઢીયા હમીદભાઈ મુમનના પર દાદા મુમનવલી લાલજી ખોરજિયાના સીધી લીટીના વારસદાર નથી તેમ છતાં તેમની જમીનમાં વહેચણીની ખોટી નોંધ પડાવી તે નોંધ આધારે તેમના વારસદાર વાહીદ અબ્દુલ રસુલ માઢીયાએ જમીન ગેરકાયદેસર રીતે પચાવી પાડી તે જમીન તેમના ગામના જ ઈમ્તિયાઝ આમીન ઓરડીયાને વેચાણથી આપી બંને શખ્સોએ એકબીજાનું મેળાપણું કરી હમીદભાઈ સુલેમાનભાઈની જમીન ગેરકાયદેસર રીતે પચાવી પાડેલી હોવાથી અને હાલમાં આ જમીન ઉપર ઈમ્તિયાઝ આમીન ઓરડીયાનો કબજો ભોગવટો હોવાથી આ અંગેની વાગડોદ પોલીસ મથકે હમીદભાઈએ બંને શખ્સો સામે ગુજરાત જમીન પચાવી પાડવા પર પ્રતિબંધ કાયદો 2020 3,4(3),5(a),5(c) મુજબ ફરિયાદ નોંધાવી હતી જે તપાસ સિદ્ધપુર ડીવાયએસપી કે કે પંડ્યાને સોંપવામાં આવી હતી.
