અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ ટ્વિટર પર પાછા ફર્યા છે. તેમનું ટ્વિટર એકાઉન્ટ બ્લુ ટિક સાથે ફરી એક્ટિવ કરવામાં આવ્યું છે. હકીકતમાં, એક દિવસ પહેલા, ટ્વિટરના નવા માલિક એલન મસ્કે ડોનાલ્ડ ટ્રમ્પના ટ્વિટર એકાઉન્ટ પરનો પ્રતિબંધ હટાવવા માટે એક પોલ કરાવ્યું હતું. આ પોલમાં 15 મિલિયનથી વધુ લોકોએ ભાગ લીધો હતો, જેમાં 51.8 ટકા લોકો ટ્રમ્પના ટ્વિટર પર પાછા ફરવા સાથે સહમત હતા, જ્યારે 48.2 ટકા અસહમત હતા.
એલન મસ્કની જાહેરાતના થોડા સમય બાદ ટ્વિટરે ડોનાલ્ડ ટ્રમ્પના એકાઉન્ટ પરનો પ્રતિબંધ હટાવી લીધો હતો. ડોનાલ્ડ ટ્રમ્પનું એકાઉન્ટ લગભગ 22 મહિના પછી રિસ્ટોર કરવામાં આવ્યું છે. પોલ પછી મસ્કે ટ્વીટ કર્યું હતું, જનતા બોલી ચુકી છે. ટ્રમ્પને બહાલ કરવામાં આવશે.
મસ્કના ટ્રમ્પ પોલ પર, બિન-લાભકારી પુસ્તકાલયના બોર્ડ પ્રમુખે લખ્યું કે જો ટ્રમ્પ ટ્વિટર પર પાછા ફરશે તો તે પ્લેટફોર્મ છોડી દેશે. તે જ સમયે, અન્ય ઘણા યુઝર્સે પણ વિવિધ પ્રતિક્રિયાઓ આપી. એક યુઝરે મસ્કને અન્ય સમાન પોલ કરવા માટે પણ સલાહ આપી હતી. એક યુઝરે મતદાન પર કટાક્ષ કરતા કહ્યું કે જો ટ્રમ્પ આ ચૂંટણીમાં હારી જશે તો તે કહેશે કે તેમાં ધાંધલી થઈ છે. આ પોલ પર મસ્ક પણ યુઝર્સની કોમેન્ટના જવાબ આપવાનું ચાલુ રાખ્યું. મસ્કે લખ્યું- ટ્વિટર ટ્રમ્પ પોલ જોવામાં આકર્ષક અને મજેદાર લાગે છે.
ભડકાઉ ટ્વીટના કારણે ટ્રમ્પનું એકાઉન્ટ સસ્પેન્ડ કરવામાં આવ્યું હતું
ડોનાલ્ડ ટ્રમ્પનું ટ્વિટર એકાઉન્ટ ભડકાઉ ટ્વીટના કારણે બ્લોક કરી દેવામાં આવ્યું હતું. વાસ્તવમાં જો બાઇડન અમેરિકામાં યોજાયેલી ચૂંટણી બાદ રાષ્ટ્રપતિ પદ માટે ચૂંટાયા હતા. આ દરમિયાન ડોનાલ્ડ ટ્રમ્પના સમર્થકોએ વ્હાઇટ હાઉસની બહાર અને અંદર હંગામો મચાવ્યો હતો. ભીડના આ હિંસક પ્રદર્શનને જોતા, ટ્વિટરે પહેલા ટ્રમ્પનું એકાઉન્ટ 12 કલાક માટે અને પછી સંપૂર્ણપણે સસ્પેન્ડ કર્યું હતું.
મસ્કે ટ્વિટરને હસ્તગત કર્યું ત્યારથી જ હતી ચર્ચાઓ
યુએસ કેપિટોલ હિંસા પછી 8 જાન્યુઆરી 2021 ના રોજ ડોનાલ્ડ ટ્રમ્પ પર ટ્વિટર દ્વારા પ્રતિબંધ મૂકવામાં આવ્યો હતો. લાંબા વિવાદ પછી 27 ઓક્ટોબર 2022ના રોજ એલોન મસ્કે ટ્વિટરને હસ્તગત કર્યું છે. ત્યારથી, મસ્કને મીડિયા અને ટ્વિટર દ્વારા વારંવાર પૂછવામાં આવી રહ્યું છે કે ટ્રમ્પ ક્યારે ટ્વિટર પર પાછા ફરશે?
