ઓસ્ટ્રેલિયાથી કેનેડા સુધી હિંદુ મંદિરોને નિશાન બનાવવાની ઘટનાઓ સતત સામે આવી રહી છે. ઓસ્ટ્રેલિયામાં ઘણા હિંદુ મંદિરોને નિશાન બનાવવાના સિલસિલા બાદ હવે કેનેડામાં હિંદુ મંદિરને નિશાન બનાવવામાં આવી રહ્યા છે. કેનેડાના ઓન્ટારિયો પ્રાંતના વિન્ડસર શહેરમાં એક હિન્દુ મંદિરમાં તોડફોડનો મામલો સામે આવ્યો છે. આ સાથે દિવાલો પર નફરતથી ભરેલા નારા પણ લખવામાં આવ્યા છે. વિન્ડસર પોલીસનું કહેવું છે કે આ કેસમાં બે શંકાસ્પદ આરોપીઓની સઘન શોધ કરવામાં આવી રહી છે. આ અંગે મંદિર પ્રશાસન દ્વારા પોલીસને જાણ કરવામાં આવી અને આરોપીઓ સામે કડક કાર્યવાહીની માંગ કરવામાં આવી છે.
મીડિયા રિપોર્ટ્સમાં કહેવામાં આવી રહ્યું છે કે મંદિરની દિવાલો પર ભારત વિરોધી અને ખાલિસ્તાનના સમર્થનમાં નારા લખવામાં આવ્યા છે. વિન્ડસર પોલીસ અધિકારીઓના જણાવ્યા અનુસાર, શ્રી સ્વામિનારાયણ મંદિરની બહાર દિવાલ પર કાળા રંગમાં હિન્દુ વિરોધી અને ભારત વિરોધી સૂત્રો લખવામાં આવ્યા હતા.
વીડિયોમાં લોકો તોડફોડ કરતા જોવા મળી રહ્યા છે
વિન્ડસર પોલીસે વધુમાં જણાવ્યું હતું કે હિન્દુ મંદિરની તોડફોડની તપાસ નફરતથી પ્રેરિત ઘટના તરીકે કરવામાં આવી રહી છે. પ્રાથમિક તપાસમાં અધિકારીઓને એક વીડિયો મળ્યો છે. જેમાં મધરાત 12 બાદ આ વિસ્તારમાં બે શંકાસ્પદ જોવા મળ્યા છે. વીડિયોમાં એક શંકાસ્પદ ઈમારતની દિવાલમાં તોડફોડ કરી રહ્યો છે જ્યારે બીજો તેની બાજુમાં ઉભો છે. આ રીતે, સીસીટીવી ફૂટેજમાં સ્પષ્ટપણે જોઈ શકાય છે કે માસ્ક પહેરેલા બે લોકો રાત્રે આવે છે અને પછી દિવાલ પર સ્પ્રે કરે છે અને ભારત વિરોધી નારા લખે છે.
પોલીસે જણાવ્યું હતું કે, શંકાસ્પદ વ્યક્તિએ ઘટના સમયે કાળું સ્વેટર, ડાબા પગ પર સફેદ રંગનો નાનો લોગો ધરાવતું કાળું પેન્ટ અને કાળા અને સફેદ રંગના ઊંચા ટોપ રનિંગ શૂઝ પહેર્યા હતા. બીજા શંકાસ્પદ વ્યક્તિએ કાળું પેન્ટ, એક સ્વેટશર્ટ, કાળા બુટ અને સફેદ મોજાં પહેર્યાં હતાં.
