દેશના ઔદ્યોગિક ઉત્પાદન (IIP)માં ઓગસ્ટ મહિનામાં ૪ ટકા વૃદ્ધિ નોંધાઈ છે. માઈનિંગ સેક્ટરે સારો પ્રદર્શન કરવાથી કુલ વૃદ્ધિને ટેકો મળ્યો છે. જુલાઈ માટેનો આંકડો સુધારીને ૪.૩ ટકા જાહેર કર્યો છે, જે પહેલા ૩.૫ ટકા હતો. માઈનિંગ સેક્ટરમાં ૬% ઉત્પાદન વૃદ્ધિ નોંધાઈ, જ્યારે ગત વર્ષે આ જ ગાળામાં ૪.૩% ઘટાડો થયો હતો. મેન્યુફેક્ચરિંગ સેક્ટરમાં ૩.૮%નો ગ્રોથ રહ્યો, જે ગત વર્ષે ૧.૨% હતો. વીજ ઉત્પાદન ૪.૧% વધ્યું, જ્યારે ગત વર્ષે આ જ ગાળામાં ૩.૭% ઘટ્યું હતું.
પ્રોડક્ટ લેવલે કોલસાનું ઉત્પાદન ૧૧.૪%, સ્ટીલ ૧૪.૨%, સિમેન્ટ ૬.૧% અને ફર્ટિલાઈઝર ૪.૬% વધ્યા હતા. જોકે ક્રૂડ ઓઈલમાં ૧.૨% અને નેચરલ ગેસમાં ૨.૨% ઘટાડો જોવા મળ્યો હતો. મેન્યુફેક્ચરિંગમાં ૨૩માંથી ૧૦ ઈન્ડસ્ટ્રી ગ્રુપે પોઝિટિવ ગ્રોથ દર્શાવ્યો. તેમાં બેઝિક મેટલ્સ (૧૨.૨%), કોક એન્ડ રિફાઈન્ડ પેટ્રોલિયમ પ્રોડક્ટ્સ (૫.૪%) અને મોટર વ્હીકલ્સ (૯.૮%) ટોચ પર રહ્યા.
ઈકરાના ચીફ ઈકોનોમિસ્ટ અદિતી નાયરે જણાવ્યું કે મેન્યુફેક્ચરિંગમાં ગ્રોથ થોડો ધીમો પડ્યો હોવા છતાં માઈનિંગ અને વીજ ક્ષેત્રમાં સુધારો થયો છે. યુઝ-બેઝ્ડ ક્લાસિફિકેશન મુજબ પ્રાઈમરી ગુડ્ઝમાં ૫.૨%, ઈન્ફ્રાસ્ટ્રક્ચર/કન્સ્ટ્રક્શન ગુડ્ઝમાં ૬.૩%, ઈન્ટરમીડિયેટ ગુડ્ઝમાં ૫% અને કન્સ્ટ્રક્શન ગુડ્ઝમાં ૧૦.૬% ગ્રોથ નોંધાયો. કન્ઝ્યુમર ડ્યૂરેબલ્સ ૩.૫% અને નોન-ડ્યૂરેબલ્સ ૬.૩% વધ્યા હતા. એપ્રિલથી ઓગસ્ટ દરમિયાન કુલ આઈઆઈપી વૃદ્ધિ ૨.૮% રહી છે, જે ગત વર્ષે આ જ ગાળામાં ૪.૩% હતી.
