રાજ્યમાં દારૂબંધી હોવા છતાં બુટલેગરો ખુલ્લેઆમ દારૂનું વેચાણ કરીને રાજ્યની કાયદા વ્યવસ્થાનો ભંગ કરી રહ્યા છે. જો કે, પોલીસ દ્વારા કાર્યવાહી કરી છાશવારે બુટલેગરોને પકડીને કાયદેસરની કાર્યવાહી કરવામાં આવે છે, પરંતુ તેમ છતાં રાજ્યમાં દારૂની હેરાફેરી થતી હોય છે અને અવારનવાર પોલીસ દ્વારા દારૂ અને બુટલેગર પકડાયા હોવાના સમાચાર મળતા હોય છે. ત્યારે હવે, એવા જ એક સમાચાર પાટનગર ગાંધીનગરથી આવ્યા છે.
માહિતી મુજબ, ગાંધીનગર જિલ્લામાં દેશી દારૂની ભઠ્ઠી પર સ્ટેટ મોનિટરિંગ સેલે દરોડો પાડી કાર્યવાહી કરી છે. બાતમીના આધારે મોનિટરિંગ સેલે પાડેલા આ દરોડામાં હજારો લીટર દારૂનો સફાયો કરાયો છે અને સાથે જ દેશી દારૂ બનાવવા માટે વપરાતો 7, 600 લીટર વોશ પણ જપ્ત કરાયો છે. આ મામલે એક આરોપીની ધરપકડ કરવામાં આવી છે. જ્યારે અન્ય બે આરોપી પોલીસને જોઈ ફરાર થઈ ગયા હતા. આથી પોલીસે બંને આરોપીને વોન્ટેડ જાહેર કર્યા છે અને તેમને પકડવા માટે કાર્યવાહી હાથ ધરી છે.
વોન્ટેડ આરોપીઓની શોધખોળ
સ્ટેટ મોનિટરિંગ સેલને બાતમી મળી હતી કે, કલોલ તાલુકા પોલીસ સ્ટેશનની હદમાં બોરસના ગામથી પલસાણા ગામ જવા તરફના રોડ પર દેશી દારૂની ભઠ્ઠી ધમધમતી રહી છે. આથી સ્ટેટ મોનિટરિંગ સેલે ત્યાં દરોડો પાડી કાર્યવાહી કરી હતી. જોકે હવે પોલીસે ગુનો નોંધી પકડાયેલા આરોપીની પૂછપરછ હાથ ધરી છે અને વોન્ટેડ આરોપીઓની શોધખોળ હાથ ધરી છે.
