અલગ અલગ આ બંને કેસમાં નાની દમણ પોલીસે ગુનો નોંધી ટેકનીકલ સર્વેલન્સ અને સીસીટીવી ફૂટેજનો અભ્યાસ કરીને બે આરોપીની ધરપકડ કરી છે. પોલીસે આરોપી પાસેથી બાઇક અને સ્નેચિંગ કરેલો મોબાઇલ કબજે લીધો છે. ગત 16મી ડિસેમ્બરની રાત્રિએ ફરિયાદી કંપનીમાંથી નોકરી કરીને બાઇક ઉપર ઘરે જઇ રહ્યો હતો ત્યારે એક બાઇક ઉપર આવેલા બે અજાણ્યા ઇસમોએ ચાલકના જમણા હાથ ઉપર લાકડાનો ફટકો માર્યો હતો. બાઇક ચાલકે કાબુ ગુમવાતા તે રોડ ઉપર પડી ગયો હતો. બંને આરોપીઓ લાકડું લઇને ઘસી આવતા ગભરાયેલો ચાલક બાઇક મુકીને ભાગ્યો હતો. લૂંટની આ ઘટના બાદ થોડા જ સમયમાં એક રાહદારી પોતાના ભાઇને ટિફિન આપીને પરત ફરી રહ્યો હતો. ત્યારે બાઇક સવાર ઇસમોએ તેમના હાથમાંથી મોબાઇલ ઝૂંટવી લઈ ફરાર થઇ ગયા હતા. ભોગ બનનાર બંને ઇસમોએ બીજા દિવસે નાની દમણ પોલીસ સ્ટેશનમાં ફરિયાદ નોંધાવી હતી. દમણ પોલીસે બંને ફરિયાદ નોંધી તપાસ હાથ ધરતા આ એક જ બાઇક સવાર ઇસમનું કામ હોવાનું જણાયું હતું. પોલીસે આ માર્ગ ઉપર લાગેલા સીસીટીવી ફૂટેજ મેળવી એનાલિસિસ કર્યા બાદ આખરે બે આરોપી રૂપેશ ગિરધારી રહે. અમરતભાઇની ચાલી, પાવરહાઉસની પાછળ-કચીગામ અને બાપાસીતરામ વાપી-સલવાવમાં રહેતો વિજય માણેકભાઇ ખંડેની ધરપકડ કરી હતી. પોલીસે બંને આરોપી પાસેથી લૂંટેલી બાઇક અને સ્નેચિંગ કરેલો મોબાઇલ કબજે લઇને આગળની કાર્યવાહી હાથ ધરી છે.
